Dhuratat “me qëllime të mira” që NUK duhet t’ua jepni të dashurve për Krishtlindje

Ato mund të jepen me synimin më të mirë – por dhuratat e tipit “përmirësim vetjak”, si çajrat për humbje peshe apo abonetë e palestrës, janë ide shumë të këqija për t’i vendosur nën bredh, sipas një studimi të ri.

Studiues nga Florida International University kanë zbuluar se dhuratat që nxisin vetë-përmirësimin shpesh i bëjnë marrësit të ndihen të gjykuar, jo të vlerësuar.

Si e zbuluan këtë?

Në pesë eksperimente me gjithsej 1,340 pjesëmarrës, njerëzit u vendosën përballë dy lloje dhuratash të ngjashme:

“Get Lean Tea” (çaj për dobësim) kundrejt çajit të thjeshtë maroken

Kalendar “Komunikim i efektshëm” kundrejt kalendarit neutral “A e dinit?”

Rezultati ishte i njëjtë në çdo rast:

➡️ Marrësit i vlerësuan më dobët dhuratat për vetë-përmirësim,

➡️ folën më negativisht për to,

➡️ dhe kishin më shumë gjasa të jepnin komente të këqija online.

Por kur njerëzit i blenë të njëjtat produkte për veten e tyre, efekti negativ zhdukej krejt.

“Dhuratat duhet të shprehin dashuri dhe bujari,” shpjegon autorja e studimit, Dr. Linnéa Chapman.

“Një dhuratë për vetë-përmirësim mund të sfidojë ndjenjën e dikujt se është i dashur ashtu siç është.”

Cilat dhurata janë më problematike?

Studimi liston disa produkte të tregtuara shpesh si dhurata festive:

karta dhurate për Peloton ose palestra

orë inteligjente si Fitbit

produkte dobësimi (çajra, vakte të parapaketuara)

karta dhurate për botox apo trajtime lëkure

libra vetë-ndihme dhe kurse zhvillimi personal

Mesazhe reklamash si “Botox është lulet e reja – dhuroni me mend!” janë shembulli perfekt i qasjes së gabuar.

Në analizë, dy të tretat e pjesëmarrësve thanë se kishin marrë dhuratë diçka të lidhur me vetë-përmirësimin, shpesh libra vetë-ndihme, aplikacione meditimi ose pajisje sportive.

Pse këto dhurata dëmtojnë?

Ekipi thotë se dhuratat e tilla nënkuptojnë se marrësi “nuk mjafton”:

“Një dyshek yoga në janar tregon motivim,” thotë Dr. Chapman.

“Por i vendosur nën bredhin e Krishtlindjes mund të thotë: Duhet të dobësohesh.”

Kjo dëmton emocionet, dhe si pasojë marrësit “shfryjnë” ciflën duke vlerësuar produktin negativisht.

Mesazhi për tregtarët

Reklamimi i produkteve të vetë-përmirësimit si dhurata festive mund të kthehet në bumerang, paralajmëron studimi.

Ekspertët sugjerojnë që këto produkte të promovohen më shumë në janar, kur njerëzit vendosin vetë rezolutat e vitit të ri.

Studimi tjetër: Mos e ekzagjeroni me paketimin e dhuratave

Një studim i veçantë nga Beijing Technology and Business University zbuloi se:

dhuruesit preferojnë paketim të tepruar, duke besuar se duket më i menduar;

marrësit e urrejnë paketimin e tepruar, duke e parë si të panevojshëm dhe jo të sinqertë.

Kur marrëdhënia është e largët – p.sh. shkëmbim dhuratash në zyrë – reagimi negativ është edhe më i fortë.

“Marrësit lodhen duke hapur shtresa të panumërta,” shkruan ekipi.

“Pastaj duhet të gjejnë mënyrën si t’i hedhin, gjë që sjell bezdi.” /GazetaExpress/